Leiðtogafundur í Höfða í brennidepli á friðarráðstefnunni Imagine Forum

Geta ríki enn unnið að diplómatískum lausnum á tímum vaxandi spennu í heiminum? Hver er framtíð alþjóðlegra afvopnunarsamninga og friðarumleitana? Þessum spurningum og fleirum verður velt upp á hinni árlegu friðarráðstefnu The Imagine Forum á vegum Höfða - friðarseturs Reykjavíkurborgar og HÍ og samstarfsaðila. Hún fer að þessu sinni fram í Silfurbergi í Hörpu þann 12. október frá klukkan 9:30–17:00. Í ár eru liðin 40 ár frá hinum sögulega leiðtogafundi Reagans og Gorbatsjovs í Höfða sem markaði tímamót í samskiptum stórveldanna og ruddi brautina að lokum kalda stríðsins. Á ráðstefnunni munu sérfræðingar, þjóðarleiðtogar og áhrifafólk á sviði mannréttinda, friðar og alþjóðamála ræða hvaða lærdóm megi draga af leiðtogafundinum og hvernig bregðast skuli við þeim öryggisógnum sem blasa við heiminum í dag.

Ráðstefnan er í beinu streymi

Meðal aðalfyrirlesara ráðstefnunnar eru Þorgerður Katrín Gunnarsdóttir utanríkisráðherra, Izumi Nakamitsu, framkvæmdastjóri afvopnunarmála hjá Sameinuðu þjóðunum, Volker Türk, mannréttindastjóri Sameinuðu þjóðanna, og Carlo Masala, prófessor og forstöðumaður Center for Intelligence and Security Studies (CISS) við Bundeswehr-háskólann í München.

Carlo Masala hefur vakið mikla athygli fyrir greiningar sínar á stríðinu í Úkraínu og er höfundur metsölubókarinnar „If Russia Wins“ sem fjallar um hugsanlega framtíð Evrópu ef Rússland næði hernaðarlegum markmiðum sínum í Úkraínu.

Fjórir leiðandi sérfræðingar á sviði kalda stríðsins, kjarnorkuöryggis og alþjóðastjórnmála taka þátt í fyrstu málstofu dagsins. Rósa Magnúsdóttir, höfundur nýrrar bókar um Höfðafundinn - Kaldastríðsborg, Sergey Radchenko, einn fremsti sagnfræðingur heims um kalda stríðið, Sharon Weiner, sérfræðingur í kjarnorkuöryggi og Thomas Blanton forstöðumaður National Security Archive ræða áhrif fundarins og þá arfleifð sem hann skilur eftir sig.

Amanpour stýrir samtali forseta Íslands og Slóveníu og fyrrverandi forseta Írlands

Christiane Amanpour, aðalfréttaskýrandi CNN í alþjóðamálum, mun stýra áhugaverðu samtali við Höllu Tómasdóttur, forseta Íslands, Natašu Pirc Musar, forseta Slóveníu, og Mary Robinson, fyrrverandi forseta Írlands, um hvernig efla megi samstöðu og mannúð í heimi sem verður sífellt sundraðri.

Einnig er vert að nefna Isabel Bramsen, forstöðumann rannsóknaseturs um friðarfræði við Háskólann í Lundi. Hún hefur vakið alþjóðlega athygli fyrir rannsóknir á friðarumleitunum, sáttamiðlun og hlutverki samræðna í lausn átaka. Í bók sinni „Fredens Logik“ fjallar hún um hvernig friður verður til í framkvæmd og hvaða aðferðir stuðla að trausti og varanlegum friði.

Í lok dags gefst einstakt tækifæri til að hlusta á samtal Söru Olsvig og Hindou Oumarou Ibrahim, tveggja áhrifamikilla leiðtoga sem þekkja af eigin raun þær umhverfis- og öryggisáskoranir sem munu móta framtíð okkar allra. Frá norðurslóðum til Sahel-svæðisins varpa þær ljósi á hvernig loftslagsbreytingar og vaxandi þrýstingur á náttúruauðlindir hafa áhrif á samfélög í dag.

Friðarráðstefnunni lýkur með erindi Bergs Ebba sem ber yfirskriftina „Do We Hear the Music? Future Perspectives on Peace and Conflict“. Í erindinu veltir hann fyrir sér hvernig listsköpun, ekki síst tónlist, hefur í gegnum tíðina mótað viðhorf til friðar og stríðs og hvaða hlutverki hún getur gegnt á tímum vaxandi óvissu og átaka.

Ráðstefnan fer fram í Silfurbergi í Hörpu 12. október og er opin öllum. Skráning og nánari dagskrá er að finna á heimasíðu verkefnisins.

Höfði friðarsetur Reykjavíkurborgar og Háskóla Íslands stendur að ráðstefnunni í samstarfi við skrifstofu forseta Íslands, utanríkisráðuneytið, Reykjavíkurborg, Eddu rannsóknasetur og Sagnfræðistofnun Háskóla Íslands