Spila- og leikgleði á leikjadjammi á Húsavík

Leik- og spilagleði var allsráðandi í miðstöð nýsköpunar, Hraðinu á Stéttinni á Húsavík, á fyrsta leikjadjammi Húsavíkur var haldið helgina 19.-21. september. Að viðburðinum stóðu Háskóli Íslands, Hraðið miðstöð nýsköpunar á Húsavík, STEM Ísland og Game Makers Iceland. Fimm teymi tóku þátt en meðal þátttakenda voru allt frá grunnskólanemum til doktorsnema. Öll lærðu án efa eitthvað nýtt um leikjagerð og leikjafræði og bjuggu til leiki sem tengdust þema leikjadjammsins: Hvalir, hafið og Húsavík!

Ásta Olga Magnúsdóttir, sérfræðingur í nýsköpun og samstarfi hjá Háskóla Íslands, og Huld Hafliðadóttir, stofnandi STEM Húsavíkur og STEM Íslands, áttu frumkvæðið að viðburðinum se hann tengist norðurslóðaverkefni sem Háskóli Íslands tekur þátt í og gengur meðal annars út á að kynna leikjafræði í dreifbýli í samfélögum á norðurslóðum. Ætlunin var annars vegar að skoða hvort ungir leikjaunnendur gætu fundið sér farveg í nýsköpun leikjadamm og hins vegar hvort frumkvöðlar og skapandi fólk úr ólíkum áttum fengi nýjar og óvenjulegar hugmyndir í gegnum leikjahugsun og innsýn í leikjafræðiverkfærakistuna.

Leiðbeinendur leikjadjammsins voru Steingerður Lóa Gunnarsdóttir, leikjafræði- og leikjahönnunarkennari með meistarasgráðu í leikjahönnun frá New York háskóla, og Marteinn Logi Jóhannsson, tölvunarfræðingur frá Háskólanum úr Reykjavík með áherslu á leikjahönnun. Þau stunda bæði leikjaþróun og eru virkir meðlimir í Game Makers Iceland, samtökum sem halda árlega viðburði tengda leikjaþróun og leikjagerð. Þar á meðal eru leikjadjömm sem bera þess vitni að leikjasenan á Íslandi stækkar ört og verður fjölbreyttari með hverju árinu.

Í leikjaheiminum er það þekkt að fyrstu fræin verða oft til á leikjadjömmum og að fyrstu kynni teyma verða líka oft þar. Markmiðið var því að kynna þetta form til leiks á Húsavík og kanna hvort leikjahönnunarfræin leiddu af sér frekari leikjagarða og leikgleði!

Ekkert af þessu hefði þó getað gerst án Hraðsins, miðstöðvar nýsköpunar á Húsavík en nágrannar þeirra eru Rannsóknarsetur Háskóla Íslands á Húsavík. Samfélagið í Hraðinu tók vel á móti hópnum og Stefán Pétur Sólveigarson, nýsköpunarstjóri Hraðsins, annaðist ekki bara skipulag heldur tók fullan þátt og aðstoðaði þátttakendur í glæsilegu Fablabi Hraðsins þar sem finna má rafíþróttaver.

Meðal þeirra sem veittu þátttakendum innblástur var Huld Hafliðadóttir, hefur unnið ötullega að uppbyggingu samfélagsdrifinna STEM-námsvistkerfa hér á landi, Halldór Snær Kristjánsson, formaður Samtaka leikjafyrirtækja á Íslands, Egill Bjarnason rithöfundur og Stefán Pétur í Hraðinu, sem er vöruhönnuður að mennt. Þá leidd Steingerður Lóa leikjadjammið með fræðslu um leikjahönnun ásamt Marteini og þau veittu þátttakendum leiðsögn í hverju skrefi hugmynda- og þróunarvinnunnar.

Leikirnirnir sem urðu til voru jafn ólíkir og þeir voru margir. Þeir spönnuðu allt frá áskorunum sem hvöttu til útiveru og fólu í sér að kasta fiskum í hvalsgin yfir í krefjandi og skapandi söguspil með orðum sem tengdust þema djammsins. „Mér fannst ég vera komin í Kappsmál, að því undanskildu allt tengdist Húsavík, hafinu og hvölunum í sjónum þar,“ segir Ásta. Einnig varð til tölvuleikur sem virkaði einfaldur á yfirborðinu en á bak við hann var heilmikil saga sem leikjahönnuðirnir höfðu spunnið á tveimur dögum. Önnur athyglisverð afurð var spurningaspil með marglyttunum sem ætlað er fyrir ólíka aldurshópa.

Helginni lauk svo með spila- og leikjaviðburði þar sem gestum og gangandi á Húsavík bauðst að prófa spilin. Leikgleðin færðist þannig frá því að snúast um að búa til leiki yfir í að spila þá.

Verkefnið er fjármagnað að hluta til af InnoGS-norðurslóðaverkefninu en það er atvinnu- og byggðaþróunarverkefni sem er ætlað að stuðla að því að efla atvinnumöguleika ungs fólks í dreifbýli á norðurslóðum.