Þórey nýr forstöðumaður Stofnunar rannsóknasetra Háskóla Íslands

Þórey S. Þórisdóttir hefur verið ráðin forstöðumaður Stofnunar rannsóknasetra Háskóla Íslands úr hópi átta umsækjenda. Stofnunin verður á næstunni flutt að Háskóla Íslands á Hólum eins og gert er ráð fyrir í stofnsamningi nýrrar háskólasamstæðu Háskóla Íslands sem varð til í sumar.

Þórey er með BS-próf í viðskiptafræði, MS-próf í alþjóðaviðskiptum og markaðsfræði og doktorspróf í viðskiptafræði, öll frá Háskóla Íslands. Hún hefur um þriggja áratuga reynslu sem stjórnandi í verslunarrekstri með mannaforráð og einnig yfir 20 ára reynslu af fyrirtækjarekstri. Í þessum störfum hefur hún öðlast víðtæka þekkingu á fjárhagsáætlanagerð, stefnumótun, mannauðsmálum og samskiptum.

Þórey hefur auk þess sinnt kennslu grunn- og framhaldsnema við Viðskiptafræðideild Háskóla Íslands í nærri áratug og hefur leiðbeint meistaranemum við gerð lokaverkefna ásamt því að kenna við Háskólann í Reykjavík. Samhliða kennslu hefur hún sinnt rannsóknum, aflað rannsóknastyrkja og gegnt ábyrgðarstörfum í stjórnum og nefndum.

„Ég hlakka til að takast á við nýtt hlutverk, kynnast enn betur því góða starfi sem unnið er á rannsóknasetrunum um land allt og vinna með starfsfólkinu að þeim verkefnum sem fram undan eru,” segir Þórey S. Þórisdóttir.

„Um leið og ég býð Þóreyju velkomna til starfa fagna ég þessu stóra skrefi í mótun háskólasamstæðunnar. Markmið okkar er að efla starfsemi hennar um land allt og rannsóknasetrin gegna þar lykilhlutverki með öfluga miðstöð í Skagafirði. Ég þakka fráfarandi forstöðumanni, Sæunni Stefánsdóttur, fyrir hennar mikilvæga framlag til stofnunarinnar. Hún á stóran hlut í því að samstæðan varð að veruleika og þessi flutningur stofnunarinnar um leið," segir Silja Bára R. Ómarsdóttir, rektor Háskóla Íslands.

„Ráðning Þóreyjar er mikilvægt skref í áframhaldandi uppbyggingu Háskóla Íslands á Hólum og Stofnunar rannsóknasetra Háskóla Íslands. Flutningur stjórnsýslu stofnunarinnar til Skagafjarðar og ráðning forstöðumanns í fullt starf á staðnum endurspeglar þá stefnu að efla HÍ á Hólum sem sérhæfðan háskóla á landsbyggðinni um leið og styrkur og sýnileiki rannsóknasetranna um allt land er aukinn. Þórey býr yfir öflugri reynslu af stjórnun, stefnumótun, kennslu og rannsóknum og ég er sannfærð um að hún muni leiða stofnunina af metnaði og framsýni á þessum spennandi tímamótum. Ég býð hana hjartanlega velkomna í Skagafjörðinn og þakka um leið Sæunni Stefánsdóttur fyrir hennar stóra þátt í uppbyggingu stofnunarinnar,“ segir Hólmfríður Sveinsdóttir, forseti Háskóla Íslands á Hólum.

Um Stofnun rannsóknasetra Háskóla Íslands

Stofnun rannsóknasetra hefur verið starfrækt við Háskóla Íslands í aldarfjórðung og undir hana heyra tólf faglega sjálfstæð rannsóknasetur víða um land. Auk rannsókna mennta þau og leiðbeina framhaldsnemum við skólann. Setrin eiga jafnframt í afar góðu samstarfi við þau samfélög sem þau starfa í, þar á meðal sveitarfélög, stofnanir, fyrirtæki, félagasamtök og einstaklinga.

Rannsóknir innan setranna eru afar fjölbreyttar og snerta meðal annars lífríki hafs og lands, ferðamál, náttúruvísindi, umhverfis- og landnýtingarmál, bókmenntir, sagnfræði, þjóðfræði og fornleifafræði. Opnun tveggja nýrra rannsóknasetra er enn fremur í undirbúningi. Annað þeirra verður á sviði menntavísinda með aðsetur á á Eskifirði og hitt tengt íslenskra hestinum og verður aðsetur þess á Hólum.