Kennslumiðstöð HÍ fagnar 25 ára afmæli

Kennslumiðstöð Háskóla Íslands fagnaði merkum áfanga – 25 ára afmæli fimmtudaginn 17. september og af því tilefni var efnt til málþings í Hátíðarsal Aðalbyggingar undir yfirskriftinni „25 ár í þágu kennslu og náms“.

Vel var mætt til hátíðarinnar og meðal gesta voru kennarar, stjórnendur, samstarfsfólk, velunnarar og vinir Kennslumiðstöðvar. Gestir komu af öllum fræðasviðum Háskóla Íslands auk annarra háskóla og stofnana. Málþingsstjóri var Margrét Sigrún Sigurðardóttir, prófessor og sviðsstjóri Kennslusviðs.

Silja Bára R. Ómarsdóttir, rektor Háskóla Íslands, setti málþingið og ávarpaði gesti. Að því loknu tók við gestafyrirlesari dagsins, Åse Nygren, kennsluþróunarstjóri við Blekinge Institute of Technology í Karlskrona og Malmö-háskóla í Svíþjóð.

Í erindi sínu, „Why, how and to what result? Contextualizing Centers for Teaching and Learning in Higher Education“, fjallaði Åse um hlutverk kennslumiðstöðva í háskólum, stöðu þeirra innan stofnana og þann árangur sem starf þeirra getur skilað. Hún byggði meðal annars á nýlegri rannsókn á þróun kennslumiðstöðva í Svíþjóð. Þar kemur skýrt fram að hlutverk þeirra hefur víkkað verulega á undanförnum árum, verkefnin orðið fjölbreyttari og samstarf við ólíka aðila innan og utan háskóla aukist.

Að erindi Åse loknu var sýnt myndband með afmæliskveðjum til Kennslumiðstöðvar frá samstarfsfólki og vinum. Myndbandið má nálgast hér að neðan.

Því næst steig Guðrún Geirsdóttir, prófessor og faglegur stjórnandi Kennslumiðstöðvar, í pontu með erindið „Hvað hefur breyst á 25 árum? Kennslumiðstöð og þróun háskólakennslu 2001–2026“. Þar leit hún yfir farinn veg og dró upp mynd af þróun Kennslumiðstöðvar síðasta aldarfjórðunginn, allt frá breyttum áherslum og viðfangsefnum til vaxandi samstarfs og stöðugt fjölbreyttara hlutverks í þróun náms og kennslu við Háskóla Íslands.

Í framhaldinu flutti Skólakór Kársness, undir stjórn Álfheiðar Björgvinsdóttur, flutti nokkur vel valin lög. Söngurinn skapaði einstaklega hlýlega stemningu í salnum og að sjálfsögðu lauk atriðinu með afmælissöng fyrir sjálft afmælisbarnið, Kennslumiðstöð.

Í lokaerindi málþingsins, „Kennslumiðstöð: Grunnur að háskólakennslu framtíðarinnar“, horfði Margrét Sigrún Sigurðardóttir til framtíðar og fjallaði um hlutverk Kennslumiðstöðvar í áframhaldandi þróun háskólakennslu og þær áskoranir og tækifæri sem fram undan eru.

Þegar formlegri dagskrá lauk var hátíðinni þó síður en svo lokið. Gestum var boðið upp á kaffi og afmælisköku og síðan haldið í opið hús í Kennslumiðstöð á 2. hæð í Setbergi, þar sem afmælisfögnuðurinn hélt áfram.

25 ár í þágu kennslu og náms

Hlutverk Kennslumiðstöðvar er að veita starfsfólki og stjórnendum Háskóla Íslands faglega ráðgjöf og stuðning við þróun náms og kennslu og vera leiðandi afl í kennsluþróun við háskólann. Á 25 árum hefur starfsemin vaxið og þróast í takt við breytt háskólasamfélag, nýjar kennsluaðferðir, tækni og fjölbreyttari þarfir kennara.

Kennslumiðstöð er staðsett á 2. hæð í Setbergi og á vefnum setberg.hi.is má finna upplýsingar um þjónustu, ráðgjöf og stuðning við kennara.
Kennslumiðstöð Háskóla Íslands er óskað innilega til hamingju með aldarfjórðungsafmælið og megi næstu 25 ár verða jafn viðburðarík.

Myndir Kristins Ingvarssonar fra afmælishátíðinni má sjá hér að neðan.