Háskólasamstæða HÍ skapar ný tækifæri fyrir Norðurland vestra

Hólmfríður Sveinsdóttir, forseti Háskóla Íslands á Hólum, fundaði með þingmönnum Norðvesturkjördæmis í heimsókn þeirra um Skagafjörð, ásamt fulltrúum sveitarfélagsins Skagafjarðar. Á fundinum var farið yfir stöðu og framtíðarsýn háskólans, þau tækifæri sem felast í nýrri háskólasamstæðu Háskóla Íslands og mikilvægi starfseminnar fyrir atvinnulíf og byggðaþróun á Norðurlandi vestra.
Í kynningu forseta kom fram að markmið háskólasamstæðu Háskóla Íslands sé að efla gæði náms, rannsókna og stoðþjónustu, auka samstarf við atvinnulíf og samfélag og tryggja að öflug háskólamenntun og rannsóknastarfsemi séu til staðar um land allt. Með tilurð háskólasamstæðu Háskóla Íslands, þar sem Háskóli Íslands á Hólum og Stofnun rannsóknasetra Háskóla Íslands eiga sameiginlega aðild, skapast öflugur þekkingarinnviður sem styður bæði við sérhæfða starfsemi á landsbyggðinni og alþjóðlega samkeppnishæfni íslensks háskóla- og rannsóknasamfélags.

Sérstök áhersla var lögð á hvernig háskólasamstæðan styður við atvinnustefnu stjórnvalda. Þar var bent á að markmiðum atvinnustefnunnar um aukna verðmætasköpun, nýsköpun, þekkingaruppbyggingu, sjálfbærni, eflingu landsbyggða og aukna samkeppnishæfni atvinnulífs verði ekki náð nema með öflugum mennta- og rannsóknainnviðum. Háskólasamstæðan stuðlar að þessum markmiðum með fjölbreyttu námsframboði um land allt, rannsóknum á heimsmælikvarða, sterku tengslaneti fræðafólks og nánu samstarfi við atvinnulíf á sviðum á borð við fiskeldi, sjávarútveg, hrossaræktar og hestamennsku, ferðaþjónustu og matvælaframleiðslu.
Á fundinum var jafnframt fjallað um þau tækifæri sem skapast fyrir Norðurland vestra með tilurð starfsemi Háskóla Íslands í landshlutanum. Þar má nefna aukna verðmætasköpun, sterkari samkeppnisstöðu fyrirtækja, ný störf, aukna nýsköpun og öflugra samstarf milli háskóla, atvinnulífs og samfélags. Fram kom að háskólastarf á svæðinu væri ekki einungis menntamál heldur lykilþáttur í framtíðaruppbyggingu atvinnulífs og byggða.
Í skilaboðum sínum til þingmanna lagði Hólmfríður Sveinsdóttir áherslu á að stofnun háskólasamstæðunnar væri ekki aðeins skipulagsbreyting heldur fjárfesting í þekkingu, fólki og framtíð íslensks háskólasamfélags. Þá var undirstrikað að samstæðan væri lykilinnviður í atvinnustefnu stjórnvalda og skapaði einstök tækifæri fyrir Norðurland vestra, m.a. til að efla atvinnulíf, styrkja útflutningsgreinar og auka verðmætasköpun í íslenskri matvælaframleiðslu.
Jafnframt var vakin athygli á mikilvægi þess að stjórnvöld fylgi eftir nauðsynlegri uppbyggingu innviða fyrir áframhaldandi þróun starfseminnar, meðal annars með fjármögnun lagareldishúss á Sauðárkróki og frekari uppbyggingu skólahúsnæðis á Hólum. Slík uppbygging er forsenda þess að nýta megi til fulls þau tækifæri sem felast í háskólasamstæðunni fyrir atvinnulíf, rannsóknir og samfélagsþróun á landsbyggðinni.
„Það er mikilvægt að kjörnir fulltrúar hafi skýra mynd af því hvernig öflugir háskólar og rannsóknastarfsemi styðja við atvinnuuppbyggingu og verðmætasköpun um allt land. Háskóli Íslands á Hólum er nú hluti af öflugri heild sem getur skapað veruleg tækifæri fyrir Norðurland vestra og íslenskt samfélag í heild,“ segir Hólmfríður Sveinsdóttir, forseti Háskóla Íslands á Hólum.