Græna skóflan fyrir framúrskarandi vistvænar endurbætur á Sögu

Fasteignir Háskóla Íslands, Andrúm arkitektar og Ístak hafa hlotið Grænu skófluna, viðurkenningu Grænni byggðar, fyrir endurbætur og umbreytingu á Sögu með framúrskarandi vistvænum og sjálfbærum hætti. Nær allt byggingarefni sem fjarlægt var úr Sögu fór í endurvinnslu og orkunýtingu.

Félagasamtökin Grænni byggð eru rúmlega 15 ára gömul og hafa það á stefnuskrá sinni að efla umhverfisvitund og grænar aðgerðir í byggingar- og mannvirkjamálum. Samtökin hafa frá árinu 2022 veitt viðurkenninguna Grænu skófluna fyrir ný mannvirki sem byggð hafa verið með framúrskarandi vistvænum og sjálfbærum áherslum. Í ár var í annað sinn veitt sérstök viðurkenning til aðila sem endurnýja mannvirki með framúrskarandi vistvænum og sjálfbærum áherslum.

Tilkynnt var um verðlaunahafa þessa árs á Degi Grænni byggðar í liðinni viku og sem fyrr segir hljóta Fasteignir Háskóla Íslands, Andrúm arkitektar og Ístak síðarnefndu viðurkenninguna fyrir endurnýjun og umbreytingu á Sögu.

Endurbætur á Sögu stóðu yfir frá því snemma árs 2022 og fram á þetta ár. Við umbreytingu hótels í háskólabyggingu og stúdentaíbúðir voru samtals um 14.000 fermetrar húsnæðis teknir í gegn. Um 4.300 tonn af efni voru fjarlægð úr byggingunni og um 68% þess fór í endurvinnslu og 24% í orkunýtingu.

„Saga hlýtur verðlaun Grænu skóflunnar í flokki endurnýjunar og endurbóta fyrir umfangsmikla og metnaðarfulla umbreytingu á einni þekktustu byggingu Reykjavíkur. Í stað nýbyggingar var stórt, eldra mannvirki endurnýtt og aðlagað að gjörbreyttri starfsemi. Um 14.000 m² hafa verið endurbyggðir fyrir starfsemi Háskóla Íslands og í byggingunni eru jafnframt 111 stúdentaíbúðir. Verkefnið sýnir með skýrum hætti hvernig hægt er að lengja líftíma stórra mannvirkja, nýta fyrirliggjandi byggingarauðlindir og skapa nýtt gildi án þess að hefja uppbyggingu frá grunni. Saga er þannig sterkt fordæmi fyrir endurnýtingu og aðlögunarhæfni núverandi byggðar,“ sagði í umsögn dómnefndar þegar viðurkenningin var afhent.