Brautskráning fór fram á Hólum í Hjaltadal föstudaginn 9. október. Athöfnin markaði tímamót í sögu skólans þar sem 26 nemendur luku námi frá Háskóla Íslands á Hólum og urðu þar með fyrsti útskriftarhópurinn undir nýju nafni skólans.
Við hátíðlega athöfn á Hólum í Hjaltadal fögnuðu nemendur, aðstandendur og starfsfólk mikilvægum áfanga. Úskriftarnemar luku námi á sviði fiskeldis og fiskalíffræði, ferðamálafræði og viðburðastjórnunar.
Þessi brautskráning var þó ekki aðeins tímamót fyrir nemendurna sjálfa heldur einnig fyrir skólann. Þetta var í fyrsta sinn sem nemendur luku námi undir nafni Háskóla Íslands á Hólum, eftir að skólinn varð aðildarháskóli í háskólasamstæðu Háskóla Íslands.
Í ávarpi sínu lagði Hólmfríður Sveinsdóttir, forseti HÍ á Hólum, áherslu á að hópurinn ætti sérstakan sess í sögu skólans. Nemendurnir hefðu verið hluti af mikilvægu umbreytingaskeiði og yrðu ávallt fyrsti hópurinn sem útskrifaðist frá Háskóla Íslands á Hólum.
Þrátt fyrir breytingar á umgjörð skólans stendur hlutverk hans óbreytt: að skapa og miðla þekkingu, stunda rannsóknir og nýsköpun og þjóna samfélagi og atvinnulífi með áherslu á sérsvið sín og hlutverk á landsbyggðinni.
Menntun sem nýtist samfélaginu
Í ræðu sinni ræddi Hólmfríður einnig um mikilvægi þess að mennta fólk á sviðum sem skipta íslenskt samfélag miklu máli. Fiskeldi og fiskalíffræði, ferðaþjónusta og viðburðastjórnun eru meðal þeirra greina sem þurfa á vel menntuðu fólki að halda, fólki sem getur byggt ákvarðanir á þekkingu, tekist á við flókin verkefni og leitað nýrra lausna.
Skólastarf á Hólum á sér langa sögu sem nær aftur til ársins 1106. Háskóli Íslands á Hólum byggir því á traustri hefð og sterkum grunni, en horfir jafnframt til framtíðar með áframhaldandi þróun sérhæfðs háskólastarfs og rannsókna.
