Nýtt námstækifæri - fagháskólanám í leikskólafræði unnið í samstarfi Menntavísindasviðs Háskóla Íslands og Háskólans á Akureyri.
Dagana 7. og 8. september næstkomandi hefst fagháskólanám í leikskólafræði í samvinnu Deildar kennslu- og menntunarfræði við HÍ og Kennaradeildar HA. „Við tökum á móti reynslumiklum hópi fólks sem starfar í leikskólum víða um land svo það verður fjör með fræðunum í húsi þessa daga,“ segir Kristín Jónsdóttir, forseti Deildar kennslu- og menntunarfræði.
Leikskólafræðin er 60 eininga diplómanám á fagháskólastigi sem myndar einskonar brú í milli framhaldsskóla og háskóla. Það er skipulagt sem hálft nám með vinnu í leikskóla í tvo vetur. Stuðningur sveitarfélaga er mikilvægur því nemar fá að stunda námið á launum á vinnutíma einn morgun í viku og sækja reglubundið staðlotur eins og þessa fyrstu í september.
„Þetta er gott tækifæri til að fara í nám á sviði sem starfsfólk í leikskólum þekkir vel og hefur áhuga á,“ segir Kristín. „Þau sem ljúka diplómunni fá námið metið að fullu eða sem heilt ár í leikskólakennaranámi hvort sem þau velja að halda áfram hér eða fyrir norðan. Námið hefur líka gildi í sjálfu sér, þau verða virkari og flinkari starfsmenn sem er gott fyrir leikskólastarfið og samfélagið allt.“
Inntökuskilyrði í fagháskólanámið eru að nemi sé í starfi á leikskóla, hafi a.m.k. þriggja ára starfsreynslu og lokið leikskólaliðanámi, leikskólabrú eða sambærilegu námi á framhaldsskólastigi.
Fagháskólanám í leikskólafræði er þróunarverkefni sem nú er í fyrsta sinn í boði um allt land en HÍ hefur staðið fyrir slíku námsframboði tvisvar áður með góðum árangri. Verkefnið er unnið í samvinnu HÍ og HA og sveitarfélaga víða um land og myndarlega styrkt af háskóla-, iðnaðar- og nýsköpunarráðuneytinu úr sjóðnum Samstarf háskóla.
Nánar má lesa um námið HÉR eða leita upplýsinga hjá Önnu Grétu Guðmundsdóttur verkefnisstýru fagháskólanámsins agg@hi.is
