Enrique del Acebo Ibáñez heiðursdoktor við Félagsfræði-, mannfræði- og þjóðfræðideild

Dr. Enrique del Acebo Ibáñez, prófessor í félagsfræði við University of Salvador og University of Buenos Aires í Argentínu, tók í gær við heiðursdoktorsnafnbót Félagsfræði-, mannfræði- og þjóðfræðideildar fyrir frjótt og farsælt samstarf sitt við Háskóla Íslands.

Enrique del Acebo Ibáñez er vel kunnur í heimalandinu sem fræðimaður og prófessor í félagsfræði. Auk þess að vera prófessor við tvo háskóla í Buenos Aires er del Acebo Ibáñez fræðimaður innan vébanda vísindaakademíu Argentínu – CONICET ásamt því sem hann starfar sem rithöfundur, listmálari og kvikmyndagerðarmaður. Hann hefur ritað um það bil 30 bækur og birt um 200 fræðigreinar.

Sérsvið del Acebo Ibáñez eru fjölbreytt og hverfast um félags- og hugvísindi. Hann hefur verið í samstarfi við fjölmarga kennara í HÍ bæði af Félagsvísinda- og Hugvísindasviði í rúma tvo áratugi og menningar- og fræðasamfélagið hefur ríkulega notið góðs af frumkvæði og ræktarsemi hans við íslenskt samfélag, ekki síst Háskóli Íslands. Del Acebo Ibáñez hefur reglulega komið til Íslands í akademískum tilgangi og bæði kennt og haldið fyrirlestra við skólann og við Háskólann á Akureyri. Þá hefur hann hefur verið gestaprófessor við Háskóla Íslands frá 2015.

Árið 2003 var undirritaður samstarfssamningur milli HÍ og Salvador-háskóla, ekki síst fyrir tilstilli del Acebo Ibáñez. Í krafti samningsins hafa tugir nemenda frá HÍ dvalið við skólann ytra við nám í greinum eins og bókmenntafræði, sögu, listfræði, kvikmyndafræði og félagsvísindum og íslenskir fræðimenn dvalið í Argentínu í boði þarlendra háskóla.

Vinnur að kvikmynd þar sem HÍ kemur við sögu

Del Acebo Ibáñez hefur um margra ára skeið unnið með íslensku fræðafólki að útgáfumálum bæði hér á landi og í Argentínu. Árið 2007 kom út hjá Háskólaútgáfunni bók eftir del Acebo Ibáñez í ritstjórn Hólmfríðar Garðarsdóttur, prófessors í spænsku, og Helga Gunnlaugssonar, prófessors í félagsfræði. Bókin ber yfirskriftina Félagsfræði rótfestunnar: Kenningar um uppruna og eðli borgarsamfélagsins og er fyrsta fræðibókin sem þýdd er úr spænsku á sviði félagsvísinda hér á landi.

Á undanförnum árum hefur del Acebo Ibáñez komið að útgáfu verka eftir íslenska höfunda sem þýdd hafa verið á spænsku. Nægir þar að nefna þýðingar Hólmfríðar Garðarsdóttur, prófessors við HÍ, á smásögum íslenskra rithöfunda, Voces de Islandia (2014) og Voces de Islandia II (2018), auk bókarinnar Días y noches de Buenos Aires (2015) eftir Ólöfu Ingólfsdóttur og safns þýðinga á ljóðum Lindu Vilhjálmsdóttur, El rojizo resplandor del faro (2025).

Del Acebo Ibáñez átti enn fremur frumkvæði að stofnun alþjóðlegs fræðafélags IACSI (International Association of Circumpolar Sociocultural Issues) sem fræðimenn af ólíkum sviðum HÍ eiga aðild að. Félagið gefur út tímaritið ritrýnda tímaritið Arctic & Antarctic International Journal of Circumpolar Sociocultural Issues.

Þá hefur del Acebo Ibáñez staðið að ráðstefnum í samstarfi við íslenskt fræðafólk og kvikmyndahátíðum þar sem íslenskar og argentínskar kvikmyndir hafa verið kynntar, nú síðast árið 2019 hér við HÍ. Í Buenos Aires hefur hann margsinnis kynnt íslenskar kvikmyndir og staðið fyrir íslenskum kvikmyndadögum. Hann vinnur að því um þessar mundir að fjármagna og undirbúa upptökur kvikmyndar sem hann hefur ritað handrit að ásamt Hilmari Oddssyni þar sem Háskóli Íslands kemur m.a. við sögu.

„Að veita dr. del Acebo Ibáñez nafnbótina heiðursdoktor felur í sér viðurkenningu við farsælan starfsferil hans sem vísindamanns á vettvangi félagsfræði og endurspeglar frjótt samstarf til margra ára. Að auki staðfestir sá gjörningur áhuga HÍ á að halda samstarfinu áfram og efla það eins og kostur er,“ segir m.a. í rökstuðningi fyrir veitingu heiðursdoktorsnafnbótar.

Del Acebo Ibáñez tók við heiðursdoktorsnafnbótinni í Hátíðasal að viðstöddum fjölda íslenskra samstarfsmanna og annarra gesta. Við það tilefni fluttu Silja Bára R. Ómarsdóttir, rektor Háskóla Íslands, Magnús Þór Torfason, forseti Félagsvísindasviðs, Hólmfríður Garðarsdóttir, prófessor í spænsku, og Helgi Gunnlaugsson, prófessor í félagsfræði, ávörp auk þess sem del Acebo Ibáñez tók sjálfur til máls og þakkaði fyrir þann heiður sem honum hefði verið sýndur. Þóroddur Bjarnason, prófessor og deildarforseti Félagsfræði-, mannfræði- og þjóðfræðideildar, stýrði athöfninni.

Myndir Kristins Ingvarssonar frá henni má finna hér að neðan.