Kennslufræði háskóla

Menntavísindasvið

Viðbótardiplóma – 30 einingar

Viðbótardiplóma í kennslufræði er stutt 30 eininga nám ætlað háskólakennurum, stundakennurum og doktorsnemum. Námið dýpkar þekkingu á kennslufræði, námsmati og endurgjöf og eykur færni kennara til þess að takast á við kennsluáskoranir samtímans.

Námið hentar vel með vinnu.

Sækja um nám

Um hvað snýst námið?

Námsleiðin er skipulögð í samstarfi við Kennslumiðstöð og er sniðin að starfandi háskólakennurum, doktorsnemum og öðrum sem kenna í háskólum á grundvelli sérfræðiþekkingar sinnar.

Með námsleið í kennslufræði háskóla er Háskóli Íslands að bregðast við þörfum háskólakennara fyrir aukna þekkingu og færni á sviði kennslufræða.

Háskólakennarar búa yfir mikilli þekkingu innan sinna sérsviða en hafa sjaldan þá sérþekkingu á námi og kennslu sem æskileg er til að skipuleggja kennslu, stýra námi nemenda og leggja á það mat. Slík kunnátta er mikilvæg í ljósi þess að nemendahópur háskólastigsins verður æ fjölbreyttari, kröfur til kennara um notkun upplýsingatækni meiri og gæði háskóla eru í auknum mæli metin út frá gæðum kennslu.

Uppbygging náms

Námið er 30 einingar og er skipulagt sem hluta nám til allt að tveggja ára.

Skyldunámskeið á námsleiðinni:

Inngangur að kennslufræði á háskólastigi, 10 einingar
Námsmat og endurgjöf, 5 einingar
Skipulag og endurskoðun námskeiða, 5 einingar
Kennsluþróun og starfendarannsóknir, 10 einingar

Viðfangsefni

Meðal þess sem fjallað er um eru:

skilgreining hæfniviðmiða
samhæft námsskipulag
tengsl hæfniviðmiða og námsmats
kennsluþróun og leiðir til að leggja mat á gæði námskeiða

Fyrirkomulag kennslu

Námið er kennt á íslensku.

Námið er skipulagt þannig að þátttakendur vinna að því samhliða störfum sínum. Auk þátttöku í tímum vinna þátttakendur ýmis verkefni tengd eigin kennslu.

Meginmarkmið

Er að þátttakendur öðlist góðan skilning á lykilhugtökum náms, kennslu og námsmats á háskólastigi.

Annað

Frekari upplýsingar um námsleiðina veitir Kennslumiðstöð

Háskóli Íslands styður við fastráðna kennara sem sækja námsleiðina með því að veita þeim styrk úr Kennslumálastjóði fyrir skrásetningargjaldi við skólann.

Skipulag náms

1. ár

Heilsársnámskeið
Kennsluþróun og starfendarannsóknir
Haust
Inngangur að kennslufræði á háskólastigi
Óháð misseri
Námsmat og endurgjöf
Skipulag og endurskoðun námskeiða

Kennsluþróun og starfendarannsóknir (STM031F)

Námskeiðið Kennsluþróun og starfendarannsóknir er samstarfsvettvangur þar sem þátttakendur vinna að rannsóknartengdum verkefnum, kennsluþróunarverkefnum eða að rannsókn á eigin kennslu. Tengja má námskeiðið umsóknum í sjóði (t.d. Kennslumálasjóð). Námskeiðið er heilsársnámskeið. Að námskeiði loknu kynna þátttakendur verkefni sín á Menntakviku, rannsóknardegi Menntavísindasviðs.

Nánar um námskeiðið

Inngangur að kennslufræði á háskólastigi (STM105F)

Á námskeiðinu kynnast þátttakendur lykilhugtökum náms, kennslu og námsmats á háskólastigi. Fjallað verður um hlutverk kennara, kennslusýn, námskenningar, kennsluhætti, kenningar um kennslu, upplýsingatækni og námsmat. Þátttakendur kynnast ýmsum hagnýtum leiðum til að skipuleggja nám og kennslu en fá auk þess innsýn inn í þær kenningar sem að baki kennsluháttum liggja. Áhersla er á að efla umræðu um kennsluhætti og styðja þátttakendur við ígrundun um eigið starf.

Nánar um námskeiðið

Námsmat og endurgjöf (STM209F)

Námsmat og endurgjöf eru veigmikil verkefni háskólakennara sem geta haft veruleg áhrif á gæði náms. Í námskeiðinu kynnast þátttakendur meginhugtökum námsmats svo og kenningum og rannsóknum á áhrifum námsmats og endurgjafar á nám. Fjallað verður um ólíkar tegundir námsmats (lokamat/leiðsagnarmat), leiðir til endurgjafar, námsmatsaðferðir svo og þátttöku nemenda í námsmati.

Nánar um námskeiðið

Skipulag og endurskoðun námskeiða (STM208F)

Námskrárgerð er mikilvægt verkefni háskólakennara. Það fellur í þeirra hlut að skipuleggja námskrá námskeiða og skapa nemendum sínum sem besta umgjörð náms. Jafnframt koma margir háskólakennarar að námskrárgerð innan námsleiða. Markmið námskeiðsins er að veita þátttakendum tækifæri til að huga faglega að námskrárgerð. Í námskeiðinu er m.a. fjallað um skipulag námskeiða, hæfniviðmið, viðhorf og væntingar nemenda, vinnuálag í námskeiðum, kennsluaðferðir og námsmat. Í námskeiðinu vinna þátttakendur að endurskoðun eigin námskeiða.

Nánar um námskeiðið

Öll fög eru skyldufög nemaVValfagBBundið val er háð skilyrðum ENámskeiðið er ekki kennt á misserinuNámsleiðin í Kennsluskrá